బాధగా ఉంది మిత్రమా..!
ఇన్నాళ్లూ ఏం సాధించామని?
మనం పెంచి పోషించుకున్న
పంతాలూపట్టింపుల బురదలో
మోకాలిబట్టి లోతులో దిగబడి
కుళ్ళి తీపులు సలుపుతున్న కాళ్ళతో
ఇప్పటికీ భరిస్తూ నిల్చున్నామే..!
ఏ క్షణాన సుఖంగా ఉన్నామని మనం?
భయంగా ఉంది మిత్రమా..!
ఇన్నాళ్లూ ఏం కూడబెట్టామని?
మన కమ్మటి స్నేహానికి మధ్యలో
మనం ఒక్కో ఇటుకా పేర్చి
పటిష్టంగా నిర్మించుకున్న
విద్వేషపు గోడల నీడలో దాక్కుని
బాధ పైకి కనబడనీయకుండా
ఇప్పటికీ కుమిలిపోతూ ఉన్నామే..!
ఏ గడియన ధైర్యంగా నిద్రపోయామని మనం!?
కంగారుగా ఉంది మిత్రమా..!
ఇన్నాళ్లూ ఏం పొందామని?
మన మధ్య అపార్థం తలెత్తినపుడు
నిప్పులు కురిపించే కళ్ళతో నీవూ
నెత్తురు మరిగించే చూపులతో నేనూ
ఏం జరిగిందో వినే ప్రయత్నమేదీ చేయక
ఎవరికీ మాట్లాడే అవకాశమైనా ఇచ్చుకోక
పొత్తును చీల్చుకుంటూ
విసురుకున్న నిశ్శబ్దపు హోరును
ఇప్పటికీ గుర్తుచేసుకుంటూ ఉన్నామే..!
ఏ పూట హాయిగా భోజనం చేశామని మనం?!
గుండె బరువెక్కిపోతోంది మిత్రమా..!
ఇన్నాళ్లూ ఏం గెలిచామని?
మనం చివరిసారిగా ఎదురుపడ్డ క్షణం
నీ కళ్ళల్లోకి సూటిగా చూడలేక నేనూ
నా ఎదుటన కుదురుగా నిలబడలేక నీవూ
ముఖాలు తిప్పుకుని
వెనక్కి తిరిగి చూడకుండా
మనమేదో ఆగర్భ శత్రువులమైనట్టు
దించలేని కొండంత పగనేదో
నెత్తిన పెట్టుకుని మోసేస్తున్నట్టు
చెరో దారిన వెళ్ళిపోయామే!
ఏ రోజున నిజాయితీగా నవ్వగలిగామని మనం?
కన్నీరు ఆగడంలేదు మిత్రమా!
ఇన్నాళ్లూ ఎలా ఉండగలిగామని?
నాకు దూరంగా నువ్వూ
నీకు దూరంగా నేనూ
ఒకరినొకరు తలచుకుంటూ
మాటిమాటికీ మెసేజ్ టైప్ చేసి చెరిపేస్తూ
నంబర్ సేవ్ చేసి... డిలిట్ చేస్తూ
మనసు ముక్కలు చేసుకుని
మరలా మరలా అతికించుకుంటున్నామే!
ఎంతకాలం మిత్రమా ఇలా భ్రమలతో బ్రతికేయడం?!
ధైర్యం సరిపోవడం లేదు మిత్రమా.!
ఇప్పుడెక్కడున్నావో.. తెలుసుకోవాలనుంది
ఎలా ఉన్నావో... చూడాలనుంది
ఏం చేస్తున్నావో... అడగాలనుంది
నువ్వు నోరారా నన్ను పిలిస్తే.. వినాలనుంది
నిన్ను మనసారా గుండెలకు.. హత్తుకోవాలనుంది
ఏ నిమిషమేమౌనో..! మనసుకొకటే దిగులు
తొలిచి తొలిచీ మదిన గిలి ముసురుకుంటోంది
ఇన్నాళ్ల ఎడబాటు ఒకసారి తుడిచేసి
క్షేమంగ ఉన్నట్లు ఒకమాట చెప్పవా..!
ఈ హృదయవేగాన్ని సంతృప్తి పరచవా.!!
-మల్లికావల్లభ పిట్ల
No comments:
Post a Comment